Akizungumza na waandishi wa Habari, Rais Ndayishimiye alieleza kuwa Burundi iko tayari kujihami na italinda mipaka yake dhidi ya uvamizi wa aina yoyote. Alisisitiza umuhimu wa amani na utulivu katika eneo hilo, akitaja kuwa vita vitakuwa na athari mbaya kwa nchi zote mbili pamoja na ukanda mzima wa Afrika Mashariki.
“Rwanda inapaswa kufikiria mara mbili kabla ya kujaribu chochote dhidi ya Burundi. Tumekuwa na historia ya mgogoro, lakini tunahimiza amani na ushirikiano wa kikanda. Hata hivyo, iwapo tutashambuliwa, hatutasita kujibu kwa nguvu za kijeshi,” alisema Rais Ndayishimiye.
Matamshi haya yanakuja wakati ambapo kumekuwa na mvutano wa muda mrefu kati ya nchi hizi mbili zilizopo Afrika ya Kati, kutokana na masuala mbalimbali ya kisiasa na kiusalama. Rais Ndayishimiye alihimiza mazungumzo na diplomasia kama njia bora ya kutatua migogoro, huku akitahadharisha kuwa Burundi haitavumilia kitendo chochote cha uchokozi kutoka nje.
Katika mkutano huo, Rais alisisitiza ushirikiano wa kikanda na akatoa wito kwa Umoja wa Afrika na mashirika mengine ya kikanda kuhakikisha amani na utulivu vinadumishwa katika eneo hilo. Alisema kuwa Burundi inaendelea kushirikiana na nchi jirani na jumuiya ya kimataifa kuhakikisha usalama wa raia wake na mipaka yake.
Hali hii inatoa tahadhari ya kuzuka kwa mgogoro wa kijeshi ambao unaweza kuathiri sio tu Burundi na Rwanda, bali pia nchi nyingine za ukanda huu, na hivyo kupelekea juhudi zaidi za kidiplomasia ili kuepusha vita vya kikanda vinavyoweza kuepukika.
