Kwa mujibu wa taarifa ya polisi, ajali hiyo ilitokea mwishoni mwa ibada ya maombi iliyoandaliwa na mhubiri wa Burundi Chris Ndikumana, anayefuatiliwa na zaidi ya watu milioni 1.3 kwenye YouTube.
Maelfu ya waumini walikuwa wamekusanyika kushiriki mkutano huo. Wakati wa kuondoka, watu wengi walijaribu kutoka kwa wakati mmoja, hali iliyosababisha msongamano mkubwa.
“Watu walikuwa wengi sana. Ilikuwa usiku, kulikuwa na msongamano, na baadhi yao wakakanyagwa,” amesema mwalimu mmoja wa Shule ya Ufundi ya Kamenge, ambako mkutano huo ulifanyika.
Majeruhi wamepelekwa katika hospitali mbalimbali za Bujumbura kwa matibabu.
Akizungumza Jumatatu kupitia mitandao ya kijamii, Mhubiri Chris Ndikumana alitoa rambirambi kwa familia za waathirika.
“Wengine wamejeruhiwa na wengine, kwa masikitiko makubwa, wamepoteza maisha. Hili limetuhuzunisha sana. Tunatoa pole kwa familia zilizopoteza wapendwa wao,” alisema.
Hadi Jumatatu, vyombo vya usalama havikuwa vimetoa taarifa kuhusu kuanzishwa kwa uchunguzi ili kubaini chanzo cha tukio hilo na wahusika wanaoweza kuwajibika.
Chris Ndikumana anajulikana pia nje ya mipaka ya Burundi. Mwaka 2024, alikusanya takribani watu 30,000 katika mkutano huko Abidjan, Côte d’Ivoire. Umaarufu wake unaonyesha ongezeko la makanisa ya kipentekoste na mikutano mikubwa ya kiinjili katika Afrika Mashariki, huku ukizua maswali kuhusu usalama na maandalizi ya mikusanyiko ya watu wengi.
